सुनसरी । इटहरी उपमहानगरपालिका–२ र ३ को सिमानामा अवस्थित तालतलैया पछिल्लो समय आन्तरिक तथा बाह्य पर्यटकहरूको आकर्षणको केन्द्र बन्दै गएको छ। प्राकृतिक सौन्दर्य, शान्त वातावरण र सहज पहुँचका कारण तालतलैया इटहरीकै लोकप्रिय पर्यटकीय गन्तव्यका रूपमा स्थापित हुँदै गएको हो।
हरियाली जंगलको काखमा फैलिएको तालतलैयाले यहाँ पुग्ने जो–कोहीलाई लोभ्याउने गर्दछ। ताल वरिपरि फैलिएको हराभरा वन क्षेत्र, चराचुरुङ्गीको मधुर आवाज र शीतल हावाले आगन्तुकलाई प्रकृतिसँग नजिक भएको अनुभूति गराउँछ। विशेषगरी बिहानको सुनौलो घाम तालको पानीमा प्रतिबिम्बित हुँदा देखिने दृश्य र साँझको शान्त वातावरणले तालतलैयाको आकर्षणलाई थप बढाएको छ।
यहाँ आउने पर्यटकहरू बोटिङ, घुमफिर, फोटोग्राफी तथा भिडियो निर्माणमा रमाउने गरेका छन्। परिवार, साथीभाइ तथा विभिन्न समूहका लागि पिकनिक र छोटो विश्रामको उपयुक्त स्थलका रूपमा पनि तालतलैया परिचित बन्दै गएको छ।
प्राकृतिक सम्पदाको संरक्षणसँगै पर्यटकीय पूर्वाधारमा सुधार हुँदै जाँदा तालतलैयाले इटहरीको पर्यटन प्रवर्द्धनमा महत्वपूर्ण योगदान पुर्याइरहेको स्थानीयको भनाइ छ। प्रकृतिको शान्त आनन्द खोज्नेहरूका लागि तालतलैया अहिले पनि उत्तिकै मनमोहक गन्तव्य बनेको छ।
